ചന്ദ്രയാൻ മൂന്നിന്റെ ഭൂമിക്ക് ചുറ്റുമുള്ള അവസാന ഭ്രമണപഥം ഉയർത്തലും വിജയകരം. ഇപ്പോൾ ചന്ദ്രയാൻ 3 പ്രവേഷിച്ചിരിക്കുന്നത് 236 കിലോമീറ്റർ കുറഞ്ഞ ദൂരവും, 1,27,609 കിലോമീറ്റർ കൂടിയ ദൂരവുമുള്ള അഞ്ചാം ഭ്രമണപഥത്തിലേക്കാണ്. ഇനി ഭൂമിയുടെ ഗുരുത്വാകർഷണ വലയത്തിൽ നിന്ന് പേടകം പുറത്ത് കടക്കുക ഒരു അർത്ഥ ഭ്രമണപഥം കൂടി സഞ്ചരിച്ച ശേഷമാണ്.
ഭൂമിക്കും ചന്ദ്രനും ഇടയിലുള്ള ട്രാൻസ് ലൂണാർ ഓർബിറ്റിലേക്ക് ഓഗസ്റ്റ് 1 ന് രാത്രി പേടകം പ്രവേശിക്കുമെന്നാണ് നിഗമനം. സോഫ്റ്റ് ലാൻഡിങ് നടക്കുക ചന്ദ്രന് ചുറ്റും അഞ്ച് ഭ്രമണപഥം താഴ്ത്തലിന് ശേഷമാണ്. മുൻ നിശ്ചയിച്ച പോലെ തന്നെ എല്ലാ ഘട്ടങ്ങളും നടന്നാൽ ഓഗസ്റ്റ് 23ന് സോഫ്റ്റ് ലാൻഡിങ് സാധ്യമായേക്കുമെന്ന് ഐഎസ്ആർഒ ചെയർമാൻ എസ്.സോമനാഥ് നേരത്തെ അറിയിച്ചിരുന്നു.
