തിരുവനന്തപുരം: ഭൂമി അനധികൃതമായി കൈപ്പറ്റിയെന്ന പരാതിയിൽ പിവി അൻവറിനെതിരെ വിജിലൻസ് അന്വേഷണം ആരംഭിച്ചു. ആലുവയിൽ 11 ഏക്കർ ഭൂമി അനധികൃതമായി കൈപ്പറ്റിയതിനെക്കുറിച്ചാണ് അന്വേഷണം. പാട്ടാവകാശം മാത്രമുള്ള ഭൂമി കൈവശപ്പെടുത്തിയതായി വിജിലൻസിന് പരാതി ലഭിച്ചിരുന്നു. പ്രാഥമിക അന്വേഷണത്തിന് ശേഷം, വിജിലൻസ് വിശദമായ അന്വേഷണത്തിന് ശുപാർശ ചെയ്തു. ഇതിന്റെ അടിസ്ഥാനത്തിൽ, ആഭ്യന്തര അഡീഷണൽ സെക്രട്ടറി അന്വേഷണത്തിന് ഉത്തരവിട്ടു.
വിജിലൻസ് ഡയറക്ടർ നൽകിയ ഉത്തരവ് തിരുവനന്തപുരം വിജിലൻസ് യൂണിറ്റിന് കൈമാറി. പ്രത്യേക അന്വേഷണ യൂണിറ്റ് രണ്ടിന് ഈ അന്വേഷണത്തിന്റെ ചുമതല ഏൽപ്പിക്കപ്പെട്ടിട്ടുണ്ട്. വിശദമായ അന്വേഷണം നടത്തി, നിശ്ചിത സമയത്തിനുള്ളിൽ റിപ്പോർട്ട് സമർപ്പിക്കണമെന്ന് നിർദേശിച്ചിട്ടുണ്ട്. കൊല്ലം സ്വദേശിയായ വ്യവസായി മുരുകേഷ് നരേന്ദ്രന്റെ പരാതിയിലാണ് ഈ അന്വേഷണം നടക്കുന്നത്.
