രണ്ടു വർഷത്തിനുശേഷം തിയറ്ററുകളിൽ എത്തുന്ന അജിത്ത് കുമാർ ചിത്രമായിരുന്നു തമിഴ് ചിത്രം വിടാമുയർച്ചിയുടെ പ്രധാന ആകർഷണം. മഗിഴ് തിരുമേനി രചനയും സംവിധാനവും നിർവഹിച്ച ഈ ചിത്രം ആക്ഷൻ ത്രില്ലർ വിഭാഗത്തിൽ പെടുന്നു. 1997-ൽ പുറത്തിറങ്ങിയ ഹോളിവുഡ് ചിത്രം ബ്രേക്ക്ഡൗണിന്റെ റീമേക്കാണ് ഇത്. രണ്ട് വർഷത്തിനുശേഷം അജിത്ത് കുമാർ ചിത്രം എന്ന നിലയിൽ, ചിത്രത്തിന് മിക്ക മാർക്കറ്റുകളിലും വലിയ പ്രീ-റിലീസ് ബുക്കിംഗ് ലഭിച്ചു. ഇപ്പോൾ ചിത്രത്തിന്റെ ഓണിംഗ് കളക്ഷൻ സംബന്ധിച്ച ആദ്യ കണക്കുകൾ പുറത്തുവന്നിട്ടുണ്ട്.
പ്രമുഖ ട്രാക്കര്‍മാരായ സാക്നില്‍കിന്റെ കണക്ക് അനുസരിച്ച്, തമിഴ്നാട്ടില്‍ ചിത്രം ആദ്യ ദിനം 22 മുതല്‍ 24 കോടി വരെയായിരിക്കും നേടുകയെന്ന് വിലയിരുത്തുന്നു. എന്നാല്‍ ഓഫ്‍ലൈന്‍ ടിക്കറ്റ് വില്‍പ്പനയുടെ കണക്കുകള്‍ കൂടി ലഭിക്കുമ്പോള്‍ തമിഴ്നാട് കളക്ഷന്‍ കൂടുതല്‍ വര്‍ധിക്കാനാണ് സാധ്യത. തമിഴ്നാടിന് പുറത്ത് മറ്റ് സംസ്ഥാനങ്ങളില്‍ നിന്ന് ചിത്രം ആദ്യ ദിനം 6-7 കോടി നേടുമെന്നാണ് സാക്നില്‍കിന്റെ വിലയിരുത്തല്‍. ഇതോടെ, ഇന്ത്യയില്‍ നിന്നുള്ള വിടാമുയര്‍ച്ചിയുടെ ആദ്യ ദിന ബോക്സ് ഓഫീസ് 28 കോടിക്ക് മുകളില്‍ ആയിരിക്കുമെന്ന് അവർ പറയുന്നു. ഇത് മികച്ച ഒരു ഓപണിംഗ് ആണ്.
അതേസമയം, ആദ്യ ദിനത്തിലേക്ക് മാത്രമല്ല, വാരാന്ത്യത്തിലെ തുടര്‍ ദിനങ്ങളിലേക്കും ചിത്രത്തിന് മികച്ച പ്രീ റിലീസ് ബുക്കിംഗ് ലഭിച്ചിട്ടുണ്ട്. ചിത്രത്തിന് ആദ്യ ദിനം ലഭിച്ച പ്രതികരണം, വാരാന്ത്യ ദിനങ്ങളിലേക്കുള്ള ബുക്കിംഗിനെ സ്വാധീനിക്കുമെന്ന് ഉറപ്പാണ്. ലൈക്ക പ്രൊഡക്ഷന്‍സ് ആണ് ചിത്രത്തിന്റെ നിര്‍മ്മാണം. അര്‍ജുന്‍ സര്‍ജ, തൃഷ കൃഷ്ണന്‍, റെജിന കസാണ്ട്ര തുടങ്ങിയവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.
