ഇന്തോനേഷ്യയിലെ പടിഞ്ഞാറൻ പ്രവിശ്യയായ വെസ്റ്റ് സുമാത്രയിലുണ്ടായ മിന്നൽപ്രളയത്തിൽ കുട്ടികളടക്കം 28 പേർ മരിച്ചതായി റിപ്പോർട്ട്. നാല് പേരെ കാണാതായി. ഇവർക്കായുള്ള തിരച്ചില്‍ തുടരുന്നുവെന്ന് റെസ്ക്യൂ ടീം മേധാവി അബ്ദുൾ മാലിക് പറഞ്ഞു . അതേസമയം മരണസംഖ്യയും നാശനഷ്ടവും കൂടാനാണു സാധ്യതയെന്ന് റിപ്പോർട്ട്.
കഴിഞ്ഞ ഏതാനും ദിവസങ്ങളായി ഈ പ്രദേശത്ത് ശക്തമായ മഴ തുടരുകയാണെന്നും ഇതിനെ തുടർന്ന് പടിഞ്ഞാറൻ സുമാത്ര പ്രവിശ്യയിലെ അഗം, തനഹ് ദാതാർ ജില്ലകളിൽ ശനിയാഴ്ച രാത്രി 10:30 മുതൽ പ്രളയ ഭീഷണി നേരിടുകയാണെന്നും പ്രാദേശിക സുരക്ഷ ഏജൻസി പുറത്തുവിട്ട പ്രസ്താവനയിൽ പറയുന്നു.
കനത്ത മഴയും ഉരുള്‍പൊട്ടലും കാരണം പ്രദേശത്ത് കല്ലുകളും ചെളിയും അടിഞ്ഞതായും 84 ഭവന യൂണിറ്റുകളും 16 പാലങ്ങളും നശിച്ചതായും റിപ്പോര്‍ട്ട്. ഈ പ്രദേശത്ത് രണ്ട് മാസത്തിനിടെയുണ്ടാകുന്ന രണ്ടാമത്തെ പ്രളയാണ് ഇത്.
