ഹജ്ജിനായെത്തുന്ന തീർത്ഥാടകർക്കായി ഹറമൈൻ ഹൈ സ്പീഡ് റെയിൽവേ 3800 ലധികം സർവീസുകൾ നടത്തുമെന്ന് പ്രഖ്യാപിച്ച് സൗദി റെയിൽവേ മന്ത്രാലയം. മുൻ വർഷത്തെ അപേക്ഷിച്ച് 430 പുതിയ സർവീസുകൾ കൂടി ഉൾപ്പെടുത്തിയിട്ടുള്ളതായി അധികൃതർ അറിയിച്ചു. ഇതോടെ 16 ലക്ഷം ആളുകൾക്ക് ഹറമൈൻ വഴി യാത്ര നടത്താൻ സാധിക്കും. ദുൽ ഖഅദ 1 ആയ മെയ് 9 മുതൽ ദുൽ ഹിജ്ജ 19 ആയ ജൂൺ 25 വരെയുള്ള തിരക്കേറിയ ദിവസങ്ങളിൽ ശരാശരി 126 സർവീസുകൾ വരെ റെയിൽവെ നടത്തുമെന്നാണ് വിവരം.
മക്ക, മദീന, ജെദ്ദ എന്നീ ടെർമിനലുകളും സുലയ്മാനിയാ ജില്ലയും, കിംഗ് അബ്ദുള്ള ഇക്കണോമിക് സിറ്റിയും ഉൾപ്പെടെ അഞ്ചോളം പ്രധാന സ്റ്റേഷനുകൾ ഉൾപ്പെടുന്നതാണ് ഹറമൈൻ ഹൈ സ്പീഡ് റെയിൽവേ പാത. പ്രധാനമായും തീർത്ഥാടക ആവശ്യങ്ങളെ മുൻ നിർത്തി 2018ലാണ് ഹറമൈൻ പ്രവർത്തനമാരംഭിച്ചത്. 453 കിലോമീറ്റർ ദൈർഘ്യമുള്ള ഡബിൾ റെയിൽവേ ലൈൻ ട്രെയിനുകൾ കിംഗ് അബ്ദുൽ അസീസ് വിമാനത്താവളത്തിൽ നിന്നാണ് സർവീസ് നടത്തുന്നത്. വിമാനത്തവളവുമായി നേരിട്ട് ബന്ധമുള്ള ലോകത്തിലെ തന്നെ ഏറ്റവും വലിയ റെയിൽവേ സ്റ്റേഷൻ കൂടിയാണിത്. 105,000 ചതുരശ്ര മീറ്റർ വിസ്തൃതിയുള്ള സ്റ്റേഷന് നിലവിൽ ആറ് പ്ലാറ്റ്ഫോമുകളുണ്ട്. അത്യാധുനിക സിഗ്നലിംഗ്, കമ്മ്യൂണിക്കേഷൻ സംവിധാനങ്ങളുള്ള ഹറമൈൻ ആഗോള തലത്തിലെ ഏറ്റവും വേഗതയേറിയ 10 ട്രെയിനുകളുടെ പട്ടികയിൽ ഇടം പിടിച്ചിട്ടുണ്ട്. റോഡിലെ ഗതാഗതക്കുരുക്ക് കുറയ്ക്കുന്നതിലും തീർത്ഥാടകരുടെ യാത്ര സുഗമമാക്കുന്നതിലും ഹറമൈൻ ഹൈ സ്പീഡ് റെയിൽവേ മുഖ്യ പങ്ക് വഹിക്കുന്നു.
