കോട്ടയം: മുൻ മുഖ്യമന്ത്രി ഉമ്മൻ ചാണ്ടി വിട പറഞ്ഞിട്ട് നാളെ ഒരു വർഷമാകുന്നു. ഉമ്മൻ ചാണ്ടി ഫൗണ്ടേഷൻ്റെ ആഭിമുഖ്യത്തിൽ നാളെ കോട്ടയത്ത് വിപുലമായ അനുസ്മരണ പരിപാടികളാണ് സംഘടിപ്പിക്കുന്നത്. ഉമ്മൻ ചാണ്ടിയെ അനുസ്മരിക്കാൻ കോൺഗ്രസ് നേതാക്കളും പ്രവർത്തകരും പുതുപ്പള്ളിയിലേക്ക് നാളെ എത്തും.
ഉമ്മൻ ചാണ്ടിയുടെ ഏറ്റവും പ്രിയപ്പെട്ട ഇടങ്ങളിൽ ഒന്നായ പുതുപ്പള്ളി സെൻ്റ് ജോർജ് വലിയ പള്ളിയിൽ രാവിലെ കുർബാന നടക്കും. തുടർന്ന് കല്ലറയിലും വീട്ടിലും പ്രാർത്ഥന. പുതുപ്പള്ളി പള്ളിയിലെ ഓഡിറ്റോറിയത്തിൽ രാവിലെ 10 മണിയ്ക്ക് നടക്കുന്ന അനുസ്മണ സമ്മേളനം ഗവർണർ ആരിഫ് മുഹമദ് ഖാൻ ഉദ്ഘാടനം ചെയ്യും.
മലങ്കര ഓർത്തഡോക്സ് സുറിയാനി സഭ പരമാധ്യക്ഷൻ ബസേലിയോസ് മാർത്തോമാ മാത്യൂസ് തൃതീയൻ കാതോലിക്കാ ബാവ ചടങ്ങിന് അദ്ധ്യക്ഷത വഹിക്കും. സിറോ മലബാർ സഭ മേജർ ആർച്ച് ബിഷപ്പ് മാർ റാഫേൽ തട്ടിൽ അനുഗ്രഹ പ്രഭാഷണം നടത്തും.
