ഷിരൂരിൽ ഉരുൾപൊട്ടലിൽ കാണാതായ അർജുന് വേണ്ടിയുള്ള തിരച്ചിലിൽ കാണാതായ ട്രക്കിൽ നിന്ന് നിർണായക സിഗ്നൽ കിട്ടി. ഐബോഡ് ഡ്രോണുകളുടെ പരിശോധനയ്ക്കിടെ നദിയിലെ ഒരു മൺകൂനയുടെ അരികിൽ നിന്നാണ് സിഗ്നൽ ലഭിച്ചത്. അർജുൻ്റെ ട്രക്ക് ആണെന്നാണ് നിഗമനം. നേരത്തെ നദിയിൽ നിന്നും മൂന്ന് സിഗ്നലുകൾ ലഭിച്ചിരുന്നു. ട്രക്കിന്റേയും മണ്ണിടിച്ചിലിൽ ഒലിച്ച് പോയ ടവറിന്റെയും സിഗ്നലുകളാകാമെന്നാണ് നേരത്തെയുണ്ടായിരുന്ന നിഗമനം. ട്രക്കിൽ നിന്നാണെന്ന് കരുതുന്ന സിഗ്നൽ 60 മീറ്റർ അകലത്തിലും അഞ്ച് മീറ്റർ താഴ്ചയിലുമാണ് ലഭിച്ചത്. ട്രക്കും ക്യാബും വേർപെട്ടിട്ടില്ല.
എന്നാൽ കനത്ത മഴയെത്തുടർന്ന് മുങ്ങൽ വിദഗ്ധർക്ക് നദിയിലേക്ക് ഇറങ്ങാൻ കഴിയുന്നില്ല. ഒഴുക്ക് ശക്തമായതിനാൽ മുങ്ങൽ വിദഗ്ധർക്ക് നദിയിലേക്ക് ഇറങ്ങാൻ കഴിഞ്ഞില്ല. ഇപ്പോഴിറങ്ങുന്നത് ഡൈവർമാരുടെ ജീവൻ അപകടത്തിലാക്കുമെന്ന് നാവികസേന വിലയിരുത്തൽ. ഐബോഡ് ടീം ഡ്രോണുകളുടെ പരിശോധന തിരയലിന് അത്യന്താപേക്ഷിതമാണ്. വെള്ളത്തിനടിയിൽ ഉപയോഗിക്കാവുന്ന ക്യാമറകൾ ഉപയോഗിച്ച് വ്യക്തമായ ചിത്രങ്ങൾ പകർത്താനുള്ള ശ്രമങ്ങളും നടക്കുന്നുണ്ട്. രണ്ട് നീളമുള്ള ബൂം എക്സ്കവേറ്ററുകൾ പരിശോധനയ്ക്കായി നദിക്ക് സമീപമുള്ള മണ്ണ് നീക്കം ചെയ്യുന്നു.