ദില്ലി: ദില്ലി-എന്‍ സി ആര്‍ നഗരത്തിലെ ചില ഒറ്റപ്പെട്ട പ്രദേശങ്ങളിൽ ശക്തമായ മഴയ്ക്ക് സാധ്യതയെന്ന് കാലാവസ്ഥാ വകുപ്പ് അറിയിക്കുന്നു. പടിഞ്ഞാറൻ ദില്ലി, ഔട്ടർ നോർത്ത് ദില്ലി, ഗുരുഗ്രാം എന്നിവിടങ്ങളിലെ ചില ഭാഗങ്ങളിൽ ഞായറാഴ്ച വൈകുന്നേരം മഴ ലഭിച്ചിരുന്നു.
അതേ സമയം രജൗരി ഗാർഡൻ, പട്ടേൽ നഗർ, ബുദ്ധ ജയന്തി പാർക്ക്, രാഷ്ട്രപതി ഭവൻ, നജഫ്ഗഡ്, ദില്ലി കൻ്റോൺമെൻ്റ്, എന്‍ സി ആറിലെ ചില പ്രദേശങ്ങള്‍ എന്നിവിടങ്ങളില്‍ ഒറ്റപ്പെട്ട സ്ഥലങ്ങളിൽ നേരിയ മഴയ്ക്ക് സാധ്യതയുണ്ടെന്ന് ഇന്ത്യൻ കാലാവസ്ഥാ വകുപ്പ് (ഐഎംഡി) ഏറ്റവും പുതിയ പ്രവചനത്തിൽ പറഞ്ഞു.
ഏകദേശം 70°E യിലായി ഒരു ശൈത്യ തരംഗവും, അക്ഷാംശം 30°N യുടെ വടക്ക് വടക്കൻ രാജസ്ഥാനിലും അയൽപക്കങ്ങളിലും ചക്രവാതച്ചുഴിയും വ്യാപിക്കുന്നു. ഈ സാഹചര്യങ്ങളുടെ അടിസ്ഥാനത്തിലാണ് മഴ പെയ്യാൻ സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചത്. തിങ്കളാഴ്‌ച രാവിലെ മുതൽ ഇടതൂർന്ന മൂടൽമഞ്ഞ് ഉണ്ടാകുമെന്നും വകുപ്പ് പ്രവചിക്കുന്നു. ദില്ലിയിൽ ഞായറാഴ്ച പകൽ രേഖപ്പെടുത്തിയ താപനില ശൈത്യകാലത്ത് ഏറ്റവും കുറഞ്ഞതാണെന്ന് അറിയിക്കുന്നു. ഇന്നലെ പകൽ 23.7 ഡിഗ്രി സെൽഷ്യസ് രേഖപ്പെടുത്തിയിരുന്നു. ഈ സീസണിലെ ഏറ്റവും കുറഞ്ഞ താപനില നവംബർ 18-നാണ്, അത് 23.5 ഡിഗ്രി സെൽഷ്യസായിരുന്നു. നഗരത്തിൽ പകൽ സമയത്ത് ഈർപ്പത്തിന്റെ അളവ് 97 ശതമാനത്തിൽ നിന്നും 68 ശതമാനത്തിൽ വരെ തുടരുന്നു.
